Осиё ўйинлари олдидан ташкил этилган матбуот анжуманида атлетларни допингга текшириш масаласи ҳам кўтарилди. Миллий олимпия қўмитаси бош котиби Жасур Матчанов ушбу масалага етарлича аҳамият берилганини маълум қилди.
«Республика спорт тиббиёти илмий-амалий марказида 700дан ортиқ спортчилар чуқурлаштирилган тиббий кўрикдан ўтишди. Уларни бир қанча критериялар бўйича ажратиб, мураббийларга спортчиларнинг соғлиғини юз фоиз ҳал қилиб олганидан сўнггина ўқув-йиғин машғулотларига жалб қилиш талаби қўйилди. Бунинг ортидан машғулотлар кечикиб кетиши мумкинлиги сабаб баъзи мураббийлар норози ҳам бўлишди. Бироқ касални ҳозирдан олдини олмасак, эртага газак олиб кетиши мумкин.
Хабарингиз бор, ўзимизда Миллий допинг агентлиги очилган. Ушбу агентлик билан биргаликда иш олиб боряпмиз. Агентлик тасдиқлаган рўйхат бор. Ушбу рўйхат асосида федерацияларга дори воситалари топширилди. Осиё ўйинларига тайёргарлик кўраётган спортчилар дори воситалари билан таъминланди. Осиё ўйинларида қатнашмаётган федерациялар бундан мустасно», - деди МОҚ расмийси.
Эслатиб ўтамиз, аввалроқ Осиё ўйинларида Ўзбекистон номидан неча нафар спортчи иштирок этиши маълум қилинганди.
