"Ювентус" ҳужумчиси Пауло Дибала ижтимоий тармоқларда ўз номига ёғилаётган танқидларга жавоб берди.
Эслатиб ўтамиз, аргентиналик футболчи А сериянинг биринчи турида "Кьево"га қарши ўйинда рақб дарвозабони ҳушсиз ётган чоғида жамоадошлари билан голни нишонлаган эди. Дарвозабон Стефано Соррентино Криштиану Роналду билан тўқнашиб кетган эди.
Кейинроқ, Соррентинонинг бурни сингани маълум бўлди, шифокорлар унда мия чайқалиши рўй берган бўлиши мумкинлигини айтишган.
"Мен ноҳақ эдим. Воқеани тўлиқ англамадим", - дея Дибаланинг сўзларини келтиради Football Italia.
Эслатиб ўтамиз, Дибаланинг голи дастлаб ҳисобланган, аммо ВАР тизими ёрдамидан сўнг гол бекор қилинган эди.
