Буэнос Айрес шаҳрида давом этаётган Ўсмирлар ўртасидаги олимпия ўйинларида ўзбекистонлик спортчилар ўзларининг муваффақиятли иштирокларини давом эттиришмоқда.

Аргентинага йўл олган 4 нафар боксчимиздан 3 нафари ярим финал йўлланмасини қўлга киритишди. Аёллар ўртасида 51 кг. вазнда турнирга йўл олган Хурсандой Холматова дастлабки босқичда болгариялик Горяна Булстоевага қарши тўқнаш келди ва имкониятни бой берди — 0:5.

69 кг.да қатнашаётган Жаҳонгир Раҳматов дастлаб 14 октябрь мезбон боксчиси Брян Агустин Аррегига қарши рингга кўтарилганди. Ҳакамларнинг баҳоларига кўра ғолиблик аргентиналик боксчига берилди — 3:2. Кеча эса ҳамюртимиз ярим финал йўлланмаси учун яна бир жангни ўтказди (ҳар бир вазнда 6 нафардан боксчи иштирок этаётгани боис, мусобақа формати шундай). Жаҳонгир бразилиялик Кауэ Белинини 4:1 ҳисобида мағлуб этди. Эътиборли томони, Раҳматов ярим финалда яна Аргентина вакили Брян Агустин Арреги билан тўқнаш келади.

81 кг. вазнда мусобақага йўл олган Тимур Мержанов эронлик Сайидсажад Мусавипоийндазоий билан жанг олиб бориб, 4:1 ҳисобида ғалаба қозонди ва ярим финал йўлланмасини қўлга киритди. Мержанов финал йўлланмаси учун бугун россиялик Руслан Колесниковга қарши рингга кўтарилади.

56 кг. вазн тоифасида Абдумалик Халаков жазоирлик Муҳаммад Қамилий билан жанг олиб бориб, ишончли ғалабани қўлга киритди — 5:0 (30:27, 30:25, 30:27, 30:26, 29:28). Халаковнинг ярим финалдаги рақиби Мирко Жехиел Куэлло (Аргентина) бўлади.

Бокс, ярим финал
22:00. 69 кг. Брян Агустин Арреги (Аргентина) — Жаҳонгир Раҳмонов (Ўзбекистон)
22:30. 81 кг. Тимур Мержанов (Ўзбекистон) — Руслан Колесников (Россия)
02:00. 56 кг. Мирко Жехиел Куэлло (Аргентина) — Абдумалик Халаков (Ўзбекистон)

Изоҳ: Жанглар бошланиши Тошкент вақти билан кўрсатилган.