Buenos Ayres shahrida davom etayotgan O‘smirlar o‘rtasidagi olimpiya o‘yinlarida o‘zbekistonlik sportchilar o‘zlarining muvaffaqiyatli ishtiroklarini davom ettirishmoqda.

Argentinaga yo‘l olgan 4 nafar bokschimizdan 3 nafari yarim final yo‘llanmasini qo‘lga kiritishdi. Ayollar o‘rtasida 51 kg. vaznda turnirga yo‘l olgan Xursandoy Xolmatova dastlabki bosqichda bolgariyalik Goryana Bulstoyevaga qarshi to‘qnash keldi va imkoniyatni boy berdi — 0:5.

69 kg.da qatnashayotgan Jahongir Rahmatov dastlab 14 oktyabr mezbon bokschisi Bryan Agustin Arregiga qarshi ringga ko‘tarilgandi. Hakamlarning baholariga ko‘ra g‘oliblik argentinalik bokschiga berildi — 3:2. Kecha esa hamyurtimiz yarim final yo‘llanmasi uchun yana bir jangni o‘tkazdi (har bir vaznda 6 nafardan bokschi ishtirok etayotgani bois, musobaqa formati shunday). Jahongir braziliyalik Kaue Belinini 4:1 hisobida mag‘lub etdi. E’tiborli tomoni, Rahmatov yarim finalda yana Argentina vakili Bryan Agustin Arregi bilan to‘qnash keladi.

81 kg. vaznda musobaqaga yo‘l olgan Timur Merjanov eronlik Sayidsajad Musavipoiyndazoiy bilan jang olib borib, 4:1 hisobida g‘alaba qozondi va yarim final yo‘llanmasini qo‘lga kiritdi. Merjanov final yo‘llanmasi uchun bugun rossiyalik Ruslan Kolesnikovga qarshi ringga ko‘tariladi.

56 kg. vazn toifasida Abdumalik Xalakov jazoirlik Muhammad Qamiliy bilan jang olib borib, ishonchli g‘alabani qo‘lga kiritdi — 5:0 (30:27, 30:25, 30:27, 30:26, 29:28). Xalakovning yarim finaldagi raqibi Mirko Jexiyel Kuello (Argentina) bo‘ladi.

Boks, yarim final
22:00. 69 kg. Bryan Agustin Arregi (Argentina) — Jahongir Rahmonov (O‘zbekiston)
22:30. 81 kg. Timur Merjanov (O‘zbekiston) — Ruslan Kolesnikov (Rossiya)
02:00. 56 kg. Mirko Jexiyel Kuello (Argentina) — Abdumalik Xalakov (O‘zbekiston)

Izoh: Janglar boshlanishi Toshkent vaqti bilan ko‘rsatilgan.