«Ливерпуль» ярим ҳимоячиси Жеймс Милнер Англия премьер-лигасининг 11-тури доирасида бўлиб ўтган «Арсенал»га қарши ўйинда (1:1) жиддий жароҳат олди.
Баҳснинг 67-дақиқасида мерсисайдликлар футболчиси жамоадоши Жо Гомес билан тўқнашиб кетиб, майдонга йиқилиши оқибатида унинг бурнидан қон оқди. Жамоа шифокорлари унга дастлабки тиббий ёрдамни кўрсатишди. Шундан сўнг Милнер майдонга қайтиб, баҳс охирига қадар ўйнади. Кейинчалик маълум бўлишича, тўқнашув пайтида Жеймснинг бурни синган экан.
Эслатиб ўтамиз, кечаги ўйинда «Ливерпуль»нинг ягона голига Милнер муаллифлик қилди. «Ливерпуль» ҳозирда 27 очко билан АПЛ жадвалида пешқадамлик қилмоқда.