Хабар бериб ўтганимиздек, шу кунларда пойтахтимизда қиличбозликнинг сабля йўналиши бўйича ўсмир қизлар ўртасида жаҳон кубоги бўлиб ўтди.
Қувонарлиси, мусобақанинг жамоавий йўналишида иштирок этган спортчиларимиз тарихда илк маротаба жаҳон кубогида шоҳсупага кўтарилишди. Қизларимиз турнир давомида Молдова ва Германия терма жамоаси вакилларини мағлуб этишди. Финал босқичида эса россиялик рақибларга мағлуб бўлишди ва кумуш медалга сазовор бўлишди. Баҳсларда юртимиз шарафини Зайнаб Дайибекова, Севинч Исмоилова, Шахноза Тоғаймуродова ва Айсулу Уснатдиновалар ҳимоя қилишди.
Яккалик баҳсларида бош мукофотга болгариялик Йоана Илиева эга чиқди. Иккинчи ва учинчи ўринлар мос равишда россиялик спортчилар Валена Кобзева ва Алина Михайловага насиб қилди.
Қайд этиш лозимки, мазкур натижадан сўнг қизларимиз жаҳон рейтингида 12-ўринга кўтарилдилар. Осиё қитъасида эса кучли учликка кириб олдилар.
Миллий олимпия қўмитаси ушбу муваффақият билан спортчиларимиз, мураббийлар ва Ўзбекистон қиличбозлик федерациясини муборакбод этади.
