ФИФА президенти Жанни Инфантино баёнот бериб, агар ЖЧ-2022 иштирокчилари сони 48тага етказиладиган бўлса, турнирнинг баъзи ўйинлари бошқа мамлакатда ўтказилиши мумкинлигини таъкидлади.
«Ҳозир Қатарда 8та стадион мавжуд. Мамлакат 32та жамоали жаҳон чемпионатига тайёргарлик кўрмоқда. Саккизта стадион билан 48та жамоадан иборат мусобақани ўтказиш қийинлигини билиш учун Эйнштейн бўлиш шарт эмас.
Назаримда, мусобақанинг баъзи ўйинларини бошқа мамлакатда ўтказиш имкониятларини қидирамиз. Албатта, бу қўшимча қийинчиликларни юзага келтиради. Аммо биз бунга ечим топамиз.
ЖЧни кенгайтириш муҳокамаси очиқ ва дўстона муҳитда кечмоқда. Агар буни амалга ошира олсак — хурсанд бўлардим», – деди Инфантино.
Эслатиб ўтамиз, ЖЧ-2022 мусобақаси 21 ноябрдан 18 декабрга қадар Қатарда бўлиб ўтади.