Жанубий Кореянинг “Сеул” футбол клуби билан шартнома имзолаган ўзбекистонлик ярим ҳимоячи Икром Алибоев 14-декабрь куни ПФЛнинг Суперлига якунлари бўйича йилнинг энг яхшиларини тақдирлаш маросимига етиб келди. "Дарё" мухбири футболчини суҳбатга тортди.

“Сеул” клуби Осиё ўйинларидаги (Жакартадаги ёзги Осиё ўйинлари) ҳаракатимни кузатган. Шундан сўнг мусобақа якунлангач “Локомотив”га таклиф билан чиққан. Суперлига якунлангач эса кореяликлар клубга расмий таклиф юборди. Уларнинг таклифи “Локомотив”га маъқул келди. Клуб билан шартномам бор эди. “Сеул”нинг таклифи эса “Локо”ни қаноатлантирди. “Сеул” билан 2021-йилгача шартнома имзоладим. Мен нафақат Ўзбекистонда, балки ундан ташқарида ҳам футбол агентлари билан ишламайман. Трансфер ҳуқуқим тўлиқлигича “Локо”га тегишли эди. Биринчи клублар ўзаро келишиб олди. “Сеул” эса мени ҳам қаноатлантирадиган таклиф берди. Шу боисдан шартномага қўл қўйдим”,— дейди Икром Алибоев.