Ҳозиргина профессионал боксчимиз Шоҳжаҳон Эргашев Россиянинг Краснодар шаҳрида фаолиятидаги навбатдаги жангини ўтказди.

Нокаутчи номини олган ҳамюртимизга аргентиналик Назарено Гастон Руиз рақиблик қилди. Аслида Эргашев угандалик Бадру Лусамбия билан жанг ўтказиши керак эди. Лекин жангга уч кун қолганида Бадрунинг Краснодарга кела олмаслиги маълум бўлди. 

Саккиз раундга мўлжалланган жанг муддатидан анча аввал якунланди. Биринчи раунднинг учинчи сониясидаёқ Шоҳжаҳон рақибини нокдаун ҳолатига тушириб қўйди. Рефери ҳисобни очди. Руиз бир амаллаб ўрнидан туриб олди. Лекин ўтказиб юборилган зарбадан сўнг нокаутга учради. Бу пайтда жангнинг 18-сонияси ўтиб бораётганди.