24 декабрь санасидан 2019 йилги мавсум тадоригини бошлаган Бекободнинг “Металлург” жамоаси футболчиларига бугундан қисқа муддатли таътил берилди. Мураббийлар ҳамда футболчилар ўз оилалари, ота-оналари бағрида Янги йил байрамини кутиб олишганидан сўнг, 3 январь санасидан яна Қибрайдаги ўқув-машғулот масканида жамланишади.

“Металлург” жамоаси аъзолари биринчи йиғинни жуда фаол ҳамда уюшқоқлик билан ўтказишди. Ҳар куни мураббийлар штаби ўйинчилар билан жисмоний тайёргарликни тиклаш борасида интенсив фаолият олиб боришди. Чигилёзди машқлари югуриш, тўп билан ишлаш, жисмоний тайёргарликни ошириш машғулотларига уланиб кетди.

Йиғиннинг охирги куни жамоа аъзолари иккига бўлинган ҳолда назорат учрашувида куч синашиб кўришди. Тажрибалилар ва ёшлар жамоалари беллашувида маҳоратли ўйинчиларнинг қўли баланд келди. Асосини ёшлар лигаси жамоаси аъзолари ташкил этган жамоа аъзолари ўйин охирида ўз дарвозасидан иккита тўп ўтказиб юборишди.

Машғулотлар поёнига етгач бош мураббий Андрей Шипилов жамоанинг барча аъзоларини кириб келаётган Янги йил байрами билан самимий муборакбод этди. Уларга байрамни оила даврасида мароқли, мазмунли ўтказиб, барча яқинларни байрам билан табриклаб, кўтаринки кайфиятда кейинги йиғинга ташриф буюришларини тилади. “Металлург” матбуот хизмати