«Челси» бош мураббийи Маурицио Сарри маълумот беришича, «Ювентус» ҳужумчиси Гонсало Игуаин бугун лондонликлар билан шартнома имзолайди.

Аргентиналик футболчи мавсум охиригача ижара асосида «Челси» сафида тўп тепади. Ярим йиллик ижара учун "аристократлар" 9 миллион евро тўлашади. Жамоа Игуаиннинг трансфер ҳуқуқини тўла сотиб олишни истаса, мавсум сўнгида 36 миллион евродан воз кечиши керак бўлади.

«Игуаин – жуда кучли ҳужумчи. Айниқса, «Наполи»даги фаолиятимнинг дастлабки йилида шундай бўлган. У мен билан ишлаган энг яхши ҳужумчилардан бири. АПЛда ўйнаб кетиш учун унда етарли тажриба бор.

У бугун шартнома имзолашига ишонамиз. Умид қиламиз, у «Челси» сафида гол уришни бошлайди. Ҳозирда у айрим муаммоларга дуч келаётганидан хабарим бор, аммо у ўзининг яхши формасига кириб олишига ишонаман.

У «Тоттенхэм»га қарши ўйинда майдонга тушадими [Англия лига кубоги ярим финалнинг жавоби ўйини доирасида — 24 январь куни]? Бунинг иложи йўқ. Унда қандайдир муаммолар борми? Билмадим. Бу ҳақда жамоа шифокори билан гаплашиши керак», – деди Сарри.

Фактлар:
— 2016 йилда «Ювентус» Игуаинни «Наполи»дан 90 миллион еврога сотиб олганди.
— 31 ёшли футболчи ушбу мавсумнинг дастлабки ярмида «Милан» сафида ижара асосида ўйнади. У 22та ўйинда майдонга тушиб, 8та гол урди ва 3та голга узатма берди.