Ўзбекистон терма жамоаси ва «Қўқон-1912» клуби ярим ҳимоячиси Жавоҳир Сиддиқов фаолиятини «Пахтакор»да давом эттиради. Бу ҳақда GoSport.uz интернет-нашри манбалари хабар бермоқда.
Маълумотларга кўра, Сиддиқов тошкентликлар билан шартнома шартларини келишиб олган. Шунингдек, «Қўқон» ҳам футболчини қўйиб юборишга рози бўлган. Трансфер яқин 48 соат ичида расман эълон қилиниши кутилмоқда. Ҳозирча шартнома шартлари бўйича аниқ маълумотлар йўқ.
Қайд қилинишича, Жавоҳир Сиддиқовга Жанубий Корея клубларидан ҳам таклифлар бўлган. Бироқ якунда «Пахтакор»нинг таклифи футболчига маъқул келган. Жамоа ОЧЛ гуруҳ босқичига йўл олгани ҳам бу ўринда муҳим роль ўйнаган бўлиши мумкин.
Эслатиб ўтамиз, Жавоҳир Сидиқов айнан «Пахтакор» клуби тарбияланувчиси саналади. Ўз вақтида «Пахтакор» асосий таркибига кира олмаган футболчи, кейинчалик ўйин амалиётига эга бўлиш учун «Қўқон-1912» клубига ижара берилган, ўтган мавсум олдидан эса қўқонликлар унинг трансфер ҳуқуқини тўлиқ сотиб олганди.
