O‘zbekiston terma jamoasi va «Qo‘qon-1912» klubi yarim himoyachisi Javohir Sidiqov faoliyatini «Paxtakor»da davom ettiradi. Bu haqda GoSport.uz internet-nashri manbalari xabar bermoqda.
Ma’lumotlarga ko‘ra, Sidiqov toshkentliklar bilan shartnoma shartlarini kelishib olgan. Shuningdek, «Qo‘qon» ham futbolchini qo‘yib yuborishga rozi bo‘lgan. Transfer yaqin 48 soat ichida rasman e’lon qilinishi kutilmoqda. Hozircha shartnoma shartlari bo‘yicha aniq ma’lumotlar yo‘q.
Qayd qilinishicha, Javohir Sidiqovga Janubiy Koreya klublaridan ham takliflar bo‘lgan. Biroq yakunda «Paxtakor»ning taklifi futbolchiga ma’qul kelgan. Jamoa OCHL guruh bosqichiga yo‘l olgani ham bu o‘rinda muhim rol o‘ynagan bo‘lishi mumkin.
Eslatib o‘tamiz, Javohir Sidiqov aynan «Paxtakor» klubi tarbiyalanuvchisi sanaladi. O‘z vaqtida «Paxtakor» asosiy tarkibiga kira olmagan futbolchi, keyinchalik o‘yin amaliyotiga ega bo‘lish uchun «Qo‘qon-1912» klubiga ijara berilgan, o‘tgan mavsum oldidan esa qo‘qonliklar uning transfer huquqini to‘liq sotib olgandi.
