Осиё чемпионлар лигаси гуруҳ босқичи 2-туридан ўрин олган “Ар-Райян” ва “Локомотив” жамоалари ўртасидаги ўйин якунига етди.

Биринчи ўйинда бўлгани каби "темирйўлчилар" бу сафар ҳам тезкор гол уришга муваффақ бўлишди. Тимурхўжа Абдухолиқовнинг пасидан кейин Туропов бўш қолган дарвозани ишғол қилди. Тўғри, Диёр голни офсайддан киритди. Аммо лайнсмен буни аниқлай олмади ва гол инобатга олинди.

Шундан сўнг тўп назорати ва ҳужумлар сони бўйича устунлик тошкентликлар томонида бўлди. Олег Зотеевнинг ўзи иккита қулай имкониятдан фойдалана олмади. Ҳар сафар ҳимоячимиз ўнг оёғи билан зарба беришга мажбур бўлди. Аммо чапақай Олег бу ишни қойиллата олмади.

"Сен урмасанг — сенга уришади". Биринчи бўлимга тугашига 7 дақиқа қолганида Лука де Брито икки футболчимиз орасидан йўллаган зарбани Илёсов қайтара олмади. Ҳисоб тенглашди.

Иккинчи бўлим аввалида устунлик қатарликлар томонида бўлди ва улар яратилган вазиятларнинг бирини гол билан якунлашди. Гол муаллифи — Ривас.

"Локомотив" ўйин охирига қадар ҳужумкорликни оширди. Бир вазиятда яна ўша Зотеев яккама-якка вазиятга чиқиб кетиши мумкин эди, аммо тўпни ўзидан узоқлаштириб юбордию, имкониятни қўлдан чиқарди. "Ар-Райян" бутун жамоа бўлиб яхши ҳимояланди ва ғалабани ўз қўлида ушлаб қолди.

"В" гурҳида иккинчи ўйинда БААнинг "Ал-Ваҳда" клуби ўз уйида Саудиянинг "Ал-Иттиҳод" клубини йирик 4:1 ҳисобида мағлубиятга учратди. Натижада гуруҳда барча жамоалар ҳисобида 3тадан очко мавжуд.

ОЧЛ. "В" гуруҳи. 2-тур
«Ар-Райян» - «Локомотив» 2:1 (1:1)
Голлар: Лука де Брито (38), Ривас (58) — Диёр Туропов (4)
"Локомотив": 35. Жавоҳир Илёсов, 5. Анзур Исмоилов, 8. Жамшид Искандеров, 10. Сардор Мирзаев, 11. Тимурхўжа Абдухолиқов, 17. Ҳусниддин Ғофуров, 20. Ислом Тўхтахўжаев (С), 23. Йован Жокич, 24. Давронбек Ҳошимов, 33. Олег Зотеев, 77. Диёржон Туропов.
"Ар-Райян": 01.Фаҳад Юнус, 02.Муҳаммад Ал Аэлдин, 03.Ривас, 05.Траоре, 07.Абдулраҳмон ал-Ҳаразий, 09.Лукка, 10.Родриго Табата, 13.Виера, 21.Муҳаммад Жума, 22.Кох Мёнг-Жин, 23.Себастьян Сория

"АЛ-ВАҲДА" - "АЛ-ИТТИҲОД" - 4:1