Футбол фақат совринлар, ёки бизнесдан иборатдек кўрингани билан унда инсонийлик туйғулари юқори ўринда туради. Баъзан футбол учрашувлари чоғида шундай кичик воқеалар бўлади-ки, уни кўриб яхшилик нақадар яхши деб ўйлаб қоласан. ..
Бугун замонавий футбол келишилган учрашувлар, бурни баланд мураббийлар ва бошқа кўплаб замонавий касалликлар билан анча ўзини олдириб қўйган бўлсада, у барибир ўзининг асл моҳиятини ҳали йўқотганича йўқ.
Футбол учрашувини томоша қилаётган мухлисларга ҳеч эътибор берганмисиз? Улар бу дунёнинг ташвишларини 90 дақиқага борса келмасга жўнатиб юборишадию, футбол аталмиш сирли оламга шўнғишади. Ҳакамнинг ўйин тугаганини билдирувчи ҳуштаги чалиниши билан мухлислар бир лаҳзада ўзлигига қайтадида, ўйин натижасига боғлиқ бўлган кайфият билан ҳаёт ташвишларига яна ғарқ бўлишади. Ўйлашимча, футболнинг асл лаззати ҳам шунда бўлса керак. Баъзан терма жамоанг енгилганда тоғлар устинга қулаб кетгандай бўлади. Ғалаба қозонганингда эса, жамики муаммоларинг бутунлай ёдингдан чиқадида, негадир ўзингни бахтли ҳис қиласан, учрашувни қайта-қайта томоша қилгинг келади. Айниқса, терма жамоамиз ғалаба қозонган учрашувнинг эртаси куни ўйиндаги голларни қайта кўриш билан янги кунни бошлайсан…
Бу шунақа сирли олам. Унда ғалаба, мукофот пуллари, машҳурлик сингари факторлар бўлсада, футболчилар ҳам сиз ва биз каби оддий инсонлар. Улар ҳам ҳудди биз каби ҳурсанд бўладилар, йиғлайдилар…
Бугун интернетда бир видеога кўзим тушди. Балки бу видеони аввал ҳам кўргандурсиз, балки бу биринчи маротаба бўлар, билмадим, лекин уни албатта кўринг. Юракларимизнинг туб-тубидан жой олган футболнинг ҳаяжонли онлари акс этган видео рольик