Жонли эфир. Телевидение тарихида ундан яхшисини ўйлаб топишмаган. Ўйлаб топа олишмайди ҳам. Лавҳалар, кўрсатувлар, шоу-ўйинлар, интеллектуал баҳслар, ёзиб олинган энг зўр клиплар, ишонинг, ҳамма-ҳаммаси жонли эфир олдида ғарибгина бўлиб қолади.
Нафақат тв, балки ОАВнинг барча қатламида-да ундан яхши, ундан кучли йўл мавжуд эмас. Ажойиб мақолаларни ўқиймиз, ҳайратомуз таҳлилларни мутолаа қиламиз, бироқ жонли эфир – у хоҳ радио, хоҳ телевидение бўлсин – барчасининг вазнидан оғирроқ.
Жонли эфирда чиқар экансиз, сиз олам билан суҳбатлашаётганингизни ҳис этасиз. Шу пайтнинг ўзида, гапираётган пайтингизда. Сизни ҳамма эшитаётгани гапираётган пайтингизга тўғри келади. Бошқа бундай имконият борми?!
Сиз бир пайтнинг ўзида ҳеч кимнинг тўсиғисиз ва ўзингизнинг ички “мен”ингиз назоратида сўзлаш имконига фақат жонли эфирда эга бўласиз. Қолган эфирларда тескариси бўлади: оғзингизга келган ҳамма нарсани айтишингиз ва исталганини қирқиб ташлашингиз мумкин – монтаж қудрати зўр.
Жонли эфирларнинг ичида эса, энг зўри, шубҳасиз, футбол шарҳлаш бўлса керак. Умуман спорт ўйинларини шарҳлаш, десак, тўғрироқ бўлади. Чунки сиз ўйиннинг бир қисмига айланасиз, динамикада яшайсиз ва ўйин охирига қадар спортчилар билан бирга – улар қаёққача олиб боришса – бирга бораверасиз.
Русларда “прямой эфир” дейилади. Инглизчадаги live сўзи негадир менга кўп маъқул. Чунки унда ҳаёт сўзи бор. Биздаги “тўғридан тўғри эфир”дан кўра “жонли эфир” чиройлироқ янграйди. Жон бор, яшамоқ бор, ҳаёт бор.
Футболдаги “жонли эфир” ҳаётимизга ўхшагани учун айтяпман юқоридаги гапни: нима бўлишини олдиндан билмаймиз, ўйин бошига қараб хулоса бера олмаймиз, учрашувнинг оқибати бутун ўйиндан-да муҳимроқ даражада!..
Эртага “Пахтакор” жамоаси Қатарнинг “Ас Садд” клуби билан ўйнайди. Ҳозир у ҳақда нима десак ҳам тахмин ё олдиндан билдирилган фикр бўлиб қолаверади. Ўйиннинг ўзи ҳақидаги тасаввуримиз фақат бошланганида, “Спорт” телеканали орқали трансляция жонли эфирда узатила бошланганида пайдо бўлади.
Бирга кузатамиз. Жонли эфирда. 19:00дан бошлаб, “Пахтакор” ўйингоҳига “жон” киради
