Жиу-житсу спорти бутун дунё миқёсида кенг ривожланган қадимий яккакураш турларидан биридир. Мазкур жанг санъати Осиё ўйинлари дастурига киритилган.   Юртимиз жиу-житсу усталари дунё миқёсида ўтказиладиган кўплаб нуфузли турнирлар – қитъа ва жаҳон чемпионатларида муносиб иштирок этиб келмоқда.   Жорий йилнинг 10-12 апрель кунлари Таиланд қироллигининг Чанг Майи шаҳрида университет талабари ўртасида Жаҳон кубоги баҳслари бўлиб ўтади.   Мазкур нуфузли спорт тадбирида жиу-житсу спорти бўйича ҳам сайёрамизнинг энг кучли спортчилари ғолиблик учун куч синашади.   Қувонарли томони бу йилги баҳсларда Ўзбекистонлик талаба жиу-житсучилар ҳам иштирок этади.   Кеча Ислом Каримов номидаги Тошкент халқаро аэропортидан Ўзбекистон терма жамоаси аъзолари Таиланд қироллигига жўнаб кетди.   Хуршид Эшонхўжаев бошчилигидаги делегациямиз аъзолари 11 апрель куни Ne-waza ва Duo system йўналишларида баҳсларга киришади.   Қайд этиш лозимки, жорий йилда терма жамоамиз аъзолари Лондон (Буюк Британия), Токио (Япония), Лос-Анжелес (АҚШ), Рио-де-Жанейро (Бразилия) шаҳарлари мезбонлигида ўтказиладиган катта дубулға турнирлари, шунингдек, БАА пойтахти Абу-Дабида ташкил этиладиган Жаҳон чемпионатида мамлакатимиз шарафани ҳимоя қилади.