Спортчининг халқаро майдондаги муваффақияти кўп нарсага боғлиқ. Бу аввало яхши жисмоний ва руҳий тайёргарлик, тўғри овқатланиш, малакали мураббий билан шуғулланиш, молиявий рағбатлантириш ва бошқа ньюанслар. Айнан мана шу жиҳатларнинг уйғунлашуви кутилган натижага олиб келади.
Миллий олимпия қўмитаси спортчиларни Токио олимпиадасига тайёрлаш йўлида федерация ва ассоциациялардан ташқари Республикамизнинг маъмурий бошқарув бўғинлари билан ҳам чуқур ҳамкорликда фаолият олиб бормоқда. Бугун МОҚда атлетларимизни Токио Олимпиадасига тайёрлаш бўйича ҳамкорлик юзасидан вилоят ҳокимиятлари мутасаддилари билан учрашув ташкил этилди. Тадбирда Миллий олимпия қўмитаси Бош котиби Жасур Матчанов бошчилигидаги МОҚ вакиллари, шунингдек, барча вилоят ҳокимларининг ўринбосарлари ҳам иштирок этишди.
“Вилоятларимизда Осиё ўйинлари, ўсмирлар Олимпиадаси, жаҳон чемпионати, Олимпия ўйинлари каби йирик мусобақаларда ғолиб бўлган спортчилариз бор. Бугун йиғилишимиздан мақсад етишиб чиқаётган ана шундай истеъдодли атлетларимизни саралаш ва уларни қўллаб-қувватлашда ҳамкорликни янада чуқурлаштиришдир. Улар фақат Олимпиадани ўйлаши керак. Бошқаси уларни безовта қилмаслиги лозим. Шу боис ҳам биз уларни ҳар томонлама қўллаб-қувватлаб, эътибор қаратиб, муносиб тайёрлашимиз зарур. Атлетларимиз қайд этаётган натижаларини кучли диетолог ва психологлар орқали ҳар уч ойда таҳлил қилиш борасида тизим йўлга қўйилган. Аммо ҳеч ким муаммодан суғурталанмаган. Шу боис ҳам биз сизлардан спортчиларимизнинг уйидан, шароитидан, ота-онасидан хабар олиб туриш борасида ёрдам беришингизни сўраймиз. Муаммо ҳаммада бўлади, лекин спортчиларимизники бизга бегона бўлмаслиги лозим. Уларда машғулот, йиғин, мусобақа ва Олимпиададан бошқа ўйлайдиган ҳеч нарсаси бўлмаслиги керак«, – деди Жасур Матчанов.
Суҳбат давомида МОҚ мутасаддилари вилоят ҳокими ўринбосарларига халқаро мусобақаларга бориб, спортчилар билан бирга яшаб, мусобақа атмосфераси билан янада яқиндан танишишни таклиф қилишди.
