Sportchining xalqaro maydondagi muvaffaqiyati ko‘p narsaga bog‘liq. Bu avvalo yaxshi jismoniy va ruhiy tayyorgarlik, to‘g‘ri ovqatlanish, malakali murabbiy bilan shug‘ullanish, moliyaviy rag‘batlantirish va boshqa nyuanslar. Aynan mana shu jihatlarning uyg‘unlashuvi kutilgan natijaga olib keladi.
Milliy olimpiya qo‘mitasi sportchilarni Tokio olimpiadasiga tayyorlash yo‘lida federasiya va assosiasiyalardan tashqari Respublikamizning ma’muriy boshqaruv bo‘g‘inlari bilan ham chuqur hamkorlikda faoliyat olib bormoqda. Bugun MOQda atletlarimizni Tokio Olimpiadasiga tayyorlash bo‘yicha hamkorlik yuzasidan viloyat hokimiyatlari mutasaddilari bilan uchrashuv tashkil etildi. Tadbirda Milliy olimpiya qo‘mitasi Bosh kotibi Jasur Matchanov boshchiligidagi MOQ vakillari, shuningdek, barcha viloyat hokimlarining o‘rinbosarlari ham ishtirok etishdi.
“Viloyatlarimizda Osiyo o‘yinlari, o‘smirlar Olimpiadasi, jahon chempionati, Olimpiya o‘yinlari kabi yirik musobaqalarda g‘olib bo‘lgan sportchilariz bor. Bugun yig‘ilishimizdan maqsad yetishib chiqayotgan ana shunday iste’dodli atletlarimizni saralash va ularni qo‘llab-quvvatlashda hamkorlikni yanada chuqurlashtirishdir. Ular faqat Olimpiadani o‘ylashi kerak. Boshqasi ularni bezovta qilmasligi lozim. Shu bois ham biz ularni har tomonlama qo‘llab-quvvatlab, e’tibor qaratib, munosib tayyorlashimiz zarur. Atletlarimiz qayd etayotgan natijalarini kuchli diyetolog va psixologlar orqali har uch oyda tahlil qilish borasida tizim yo‘lga qo‘yilgan. Ammo hech kim muammodan sug‘urtalanmagan. Shu bois ham biz sizlardan sportchilarimizning uyidan, sharoitidan, ota-onasidan xabar olib turish borasida yordam berishingizni so‘raymiz. Muammo hammada bo‘ladi, lekin sportchilarimizniki bizga begona bo‘lmasligi lozim. Ularda mashg‘ulot, yig‘in, musobaqa va Olimpiadadan boshqa o‘ylaydigan hech narsasi bo‘lmasligi kerak«, – dedi Jasur Matchanov.
Suhbat davomida MOQ mutasaddilari viloyat hokimi o‘rinbosarlariga xalqaro musobaqalarga borib, sportchilar bilan birga yashab, musobaqa atmosferasi bilan yanada yaqindan tanishishni taklif qilishdi.
