Ўзбекистон футбол ассоциацияси томонидан мамлакатимизда фаолият юритаётган ҳакамларнинг малакасини ошириш, ҳакамлар томонидан ўйинларни бошқаришда ҳалоллик ва шаффофликни таъминлаш мақсадида бир қатор чора-тадбирлар амалга оширилмоқда.

Жумладан, Суперлига ва ПРО-лиганинг ҳар бир туридан сўнг ЎФА Ҳакамлар ва назоратчилар департаменти томонидан ҳакамлар учун махсус семинар ташкил қилиниб, ўйинлар давомида йўл қўйилган хато ва камчиликлар таҳлил қилиб борилмоқда.

30 май куни ана шундай семинарларнинг навбатдагиси "Бунёдкор" академияси биносида ташкил қилинади. Семинар соат 10:30да бошланади.

Семинар давомида ҳакамларга турли видеолавҳалар намойиш қилиниб, уларнинг билим ва кўникмалари синовдан ўтказилади. Шунингдек, ўйин қоидаларига киритилган баъзи жузъий ўзгаришлар ҳақида маълумот берилади. Мазкур семинарга юртимизда фаолият олиб бораётган спортга ихтисослашган оммавий ахборот воситалари вакиллари таклиф этилади.