O‘zbekiston futbol assosiasiyasi tomonidan mamlakatimizda faoliyat yuritayotgan hakamlarning malakasini oshirish, hakamlar tomonidan o‘yinlarni boshqarishda halollik va shaffoflikni ta’minlash maqsadida bir qator chora-tadbirlar amalga oshirilmoqda.
Jumladan, Superliga va PRO-liganing har bir turidan so‘ng O‘FA Hakamlar va nazoratchilar departamenti tomonidan hakamlar uchun maxsus seminar tashkil qilinib, o‘yinlar davomida yo‘l qo‘yilgan xato va kamchiliklar tahlil qilib borilmoqda.
30 may kuni ana shunday seminarlarning navbatdagisi "Bunyodkor" akademiyasi binosida tashkil qilinadi. Seminar soat 10:30da boshlanadi.
Seminar davomida hakamlarga turli videolavhalar namoyish qilinib, ularning bilim va ko‘nikmalari sinovdan o‘tkaziladi. Shuningdek, o‘yin qoidalariga kiritilgan ba’zi juz’iy o‘zgarishlar haqida ma’lumot beriladi. Mazkur seminarga yurtimizda faoliyat olib borayotgan sportga ixtisoslashgan ommaviy axborot vositalari vakillari taklif etiladi.
