Копа Американинг дастлабки кичик сенсацияларидан бири "В" гуруҳида қайд этилди. Мусобақада илк марта иштирок этаётган Қатар терма жамоаси Жанубий Американинг кучли термаларидан бири — Парагвай билан жанговор дуранг ўйнади.

Учрашувнинг 2-дақиқасидаёқ тўп ҳимоячининг қўлига теккани боис ҳакам қатарликлар дарвозаси томон пенальти белгилади. Кордосо кучли зарба билан ҳисобни очди.

Иккинчи бўлим бошида парагвайликларнинг голи VAR туфайли бекор қилинган бўлса, орадан кўп ўтмасдан Гонсалес олис масофадан рақиб дарвозасини ишғол қилди — 2:0.

Ушбу голдан кейин ўйин тақдири ҳал бўлгандек эди гўё, аммо осиёликлар таслим бўлишмади. Дастлаб Али Алмойз жарима майдончаси ташқарисидан айланма зарба билан тўпни Фернандес қўриқлаётган дарвозага жойлаб қўйди. Унинг голи чирой борасида Гонсалесникидан кам бўлмади.

Ўйин тугашига 13 дақиқа қолганида Қатар чиройли комбинация ташкил қилди ва Хухий яккака-якка вазиятга чиқиб, дарвозани ишғол қилди — 2:2.

Табиийки, бу натижа Парагвай терма жамоаси футболчиларини қониқтирмади.

Америка кубоги, "В" гуруҳи, 1-тур
Парагвай – Катар 2:2 (1:0, 1:2)
Голлар: 1:0 – 4, пенальти Кардосо, 2:0 – 56 Гонсалес, 2:1 – 68 Али, 2:2 – 77 Хухи.
Парагвай – Фернандес, Бальбуэна, Арсамендия, Вальдес, Алонсо, Ортис, Рохас (Санчес, 79), Альмирон, Перес (Гонсалес, 46), Домингес (Итурбе, 83), Кардосо.
Катар – Аш-Шийб, Салмон, Ҳассан, Педру Мигел, Ар-Ровий, Хатим (Будиаф, 88), Хухий, Мадибо, Холид, Афиф, Али.
Огоҳлантиришлар: Мадибо (11), Сальман (26), Перес (40), Хассан (61), Хухи (71), Бальбуэна (80).