Маълумки, Ўзбекистон Миллий олимпия қўмитаси юртимиз спортчиларини Токио 2020 Олимпия ўйинларига пуҳта тайёрлаш, уларнинг жисмоний ва функционал тайёргарлигини юксалтириш мақсадида қатор амалий ишларни бажариб келмоқда. Айнан шу мақсадда МОҚ қошида комплекс-илмий гуруҳ ташкил этилган бўлиб, ушбу гуруҳ аъзолари Рустам Холмуҳамедов, Сойибжон Тажибаев ва Рашид Маткаримов бокс ҳамда таэквондо WT бўйича Ўзбекистон миллий терма жамоа аъзолари билан тест кузатувларини ўтказишди. Мазкур кузатувлар бир вақтнинг ўзида 10 нафар спортчининг функционал ҳолати ҳамда берилган юклама ҳажмини аниқлаш имконини берди.
Бундан ташқари комплекс-илмий гуруҳда фаолият олиб бораётган олимлар Ф.Керимов, С.Эштаев А.Ачилов ва Ж.Акрамов томонидан гимнастика бўйича мамлакат терма жамоаси аъзолари билан илмий кузатувлар олиб борилди. Россиялик мутахассислар билан ҳамкорликда ўтказилган мазкур илмий кузатувлар жараёнида мобил лабораториядан фойдаланиб спортчилар ҳамда уларнинг мураббийларига тегишли тавсиялар берилди.