Эртага Ўзбек футбол ватани Қўқонда катта футбол байрами. “Қўқон-1912” жамоаси Ҳўқанди латифда бошланган “Халқаро ҳунармандчилик фестивали” доирасида Тожикистоннинг “Хўжанд” клубига қарши халқаро ўртоқлик учрашувини ўтказади. Мазкур баҳс олдидан айрим маълумотлар билан таништириб ўтамиз.
Ўзаро ўйинлар
Бу икки жамоа собиқ Иттифоқ биринчиликларида (2-лига 7-минтақа) тўрт бор тўқнаш келишган.
1988 ва 1989 йиллари бўлиб ўтган учрашувларнинг иккитасида Хўжандликларнинг қўли баланд келган бўлса, битта баҳсда вакилларимиз ғалаба қозонишган. Битта ўйинда эса ҳисоб очилмаган. Тўплар нисбати - 5:5.
Айтганча, бу жамоалар жорий йилнинг 17 июль куни ўзаро ўртоқлик учрашувида майдонга тушишди. Мазкур баҳсда ҳам нурсиз дуранг қайд этилди.
“Хўжанд” ҳақида қисқача маълумот
Клуб расмий сайти берган маълумотларга кўра, Тожикистон футболининг биринчи тамал тошлари айнан Хўжандда қўйилган. 1920 ва 1930 йиллар оралиғида Тожикистондаги биринчи футбол клуби айнан Хўжанд шаҳрида ташкил этилган.
1925 йилда Хўжанд ва Драгомирово шаҳарлари жамоалари ўртасидаги ўйин бўлиб ўтади. Ушбу жамоаларнинг биринчи тўқнашувида хўжандликлар 4:1 ҳисобида ғалаба қозонишди. Такрорий ўйинда ҳам рақибимиз 1:0 ҳисобида зафар қучган экан.
Хўжанд шаҳри футболи тарихидан ўрин олган ва ўша биринчи жамоада футболчилар билан танишинг: Данилов, Стан, Витовский, Ёлкин, Сретенский, Проскуряков, Зоров, Василев, Манасянс, Лукашин, Ламзин, Трофимов.
Кейинчалик Хўжанд шаҳри шафарини ҳимоя қиладиган жамоани “Горняк” деб атай бошлашди. Ушбу жамоа собиқ Иттифоқ чемпионати “Б” классида иштирок этди. Маълум вақтдан кейин жамоа номини “Помир” деб ўзгартиришди. “Помир” бир неча бор совриндорлар қаторидан ўрин олди.
1976 йилда бугунги “Хўжанд” жамоаси ташкил топди. Жамоанинг биринчи мураббийи спорт устаси Владимир Бурин. Айнан ўша йили Марказий Осиё чемпионати (“Б” класс) йўлга қўйилди. “Хўжанд” клуби ушбу мусобақада 15 йил иштирок этди.
Тожикистон мустақилликка эришгач, “Хўжанд” ўз мамлакати чемпионатида мунтазам қатнашиб келмоқда ва бугунги кунга қадар кўплаб ютуқларга эришди.
Бугунги кунда рақибимиз Тожикистон чемпионатининг 13-туридан кейин 20 очко тўплаган ҳолда 2-ўринда бормоқда. Тожикистон биринчилигида 8 та клуб иштирок этади. Хўжандликлар шу кунга қадар чемпионатда 22 та тўп киритишга муваффақ бўлишди.
Рақибимизнинг трансфер нархи
Дунёга машҳур transfermarkt.de сайтининг маълумотига кўра, “Хўжанд” жамоасининг тахминий трансфер нархи 650 минг еврони ташкил этмоқда. Жамоанинг энг қимматбаҳо ўйинчиси Даврон Эргашевдир. 1988 йилда туғилган ушбу ярим ҳимоячининг тахминий трансфер баҳоси 300 минг еврога тенг. Яна бир футболчи Жаҳонгир Алиевнинг тахминий трансфер нархи 150 минг евро деб баҳоланган.
МАЪЛУМОТ УЧУН:
“Хўжанд” футбол клуби.
Ташкил топган йили: 1976.
Клуб Президенти: Ражаббой Аҳмадзода.
Ижрочи директор: Муроджон Умаров.
Лақаби: Хўжандликлар, Шимоликлар, Сўғдийлар.
Шаҳар: Хўжанд.
Расмий веб-сайт: fc-khujand.tj.
Стадиони: Мустақилликнинг 20 йиллиги.
Стадион сиғими: 25 000
Бош мураббий: Виталий Левченко.
Жамоа сардори: Манучеҳр Аҳмедов.
ЖАМОАНИНГ ЭРИШГАН ЮТУҚЛАРИ:
Тожикистон чемпионати кумуш медаль соҳиби (6):
1998, 2002, 2003, 2015, 2017, 2018.
Тожикистон чемпионати бронза медаль соҳиби (5):
1996, 1997, 2000, 2008, 2009.
Тожикистон кубоги ғолиби (4): 1998, 2002, 2008, 2017.
Тожикистон кубоги финалчиси (2): 1997, 2010.
Жамоа таркиби:
ДАРВОЗАБОНЛАР
1. Далер Баротов
13. Мўминжон Гадойбоев
91. Давид Купатадзе (Грузия)
ҲИМОЯЧИЛАР
2. Соҳибжон Ҳакимов
4. Давронжон Эргашев
5. Парвиз Бокиев
14. Ойбек Абдуғафоров
21. Фирдавс Чакалов
22. Манучеҳр Аҳмедов
44. Асил Бегимқулов (Ўзбекистон)
ЯРИМ ҲИМОЯЧИЛАР
6. Ҳожибой Зиёев
7. Комрон Мирзонажод
8. Бахтиёр Чориев
11. Амиржон Раҳимов
18. Парвиз Алиев
23. Дилшод Каримов
ҲУЖУМЧИЛАР
10. Дилшод Бозоров
11. Турсунали Рустамов (Қирғизистон)
15. Дамир Азимов
17. Дилшод Васиев
62. Жаҳонгир Эргашев
