«Макдональдс» собиқ ходими Паула Лека "Ювентус" футболчиси Криштиану Роналдунинг биргаликда кечки овқатни тановул қилиш ҳақидаги таклифини қабул қилишини айтиб ўтди.

Португалиялик футболчи аввалроқ The Sun нашрига берган интервьюсида ёшлик пайтида «Макдональдс»га кириб, бепул бургер еганини айтиб ўтган эди. Роналду ёшлик пайтини эслар экан, унга меҳрибонлик кўрсатган аёлга миннатдорчилик мақсадида уни кечки овқатга таклиф қилиш учун қидираётганини, аммо уни топа олмаётганини айтиб ўтган эди.

«Машғулотдан кейин болалар келишарди. Қолган бургерлар билан уларни меҳмон қилишга менежеримиз рухсат берган эди. Улардан бири Криштиану Роналду эди. Ўша пайтда у энг камтар болалардан бири эди. Бу ҳолат деярли ҳар куни такрорланар эди.

Ўша йилларни табассум билан эслайман. Мен бу ҳақда фарзандимга айтиб бердим, аммо у менга ишонмади. Унинг онаси бургер билан Криштиану Роналдунинг қорнини тўйдирганини тасаввур қила олмайди. Бу ҳақда турмуш ўртоғим ҳам билар эди. Баъзан эрим мени ишдан олиш учун кечаси келарди. Ўшанда у Криштиануни кўрган.

Агар Роналду мени кечки овқатга таклиф қилса, мен бу таклифни қабул қилишга тайёрман», – деди Паула.