«Makdonalds» sobiq xodimi Paula Leka "Yuventus" futbolchisi Krishtianu Ronalduning birgalikda kechki ovqatni tanovul qilish haqidagi taklifini qabul qilishini aytib o‘tdi.

Portugaliyalik futbolchi avvalroq The Sun nashriga bergan intervyusida yoshlik paytida «Makdonalds»ga kirib, bepul burger yeganini aytib o‘tgan edi. Ronaldu yoshlik paytini eslar ekan, unga mehribonlik ko‘rsatgan ayolga minnatdorchilik maqsadida uni kechki ovqatga taklif qilish uchun qidirayotganini, ammo uni topa olmayotganini aytib o‘tgan edi.

«Mashg‘ulotdan keyin bolalar kelishardi. Qolgan burgerlar bilan ularni mehmon qilishga menejerimiz ruxsat bergan edi. Ulardan biri Krishtianu Ronaldu edi. O‘sha paytda u eng kamtar bolalardan biri edi. Bu holat deyarli har kuni takrorlanar edi.

O‘sha yillarni tabassum bilan eslayman. Men bu haqda farzandimga aytib berdim, ammo u menga ishonmadi. Uning onasi burger bilan Krishtianu Ronalduning qornini to‘ydirganini tasavvur qila olmaydi. Bu haqda turmush o‘rtog‘im ham bilar edi. Ba’zan erim meni ishdan olish uchun kechasi kelardi. O‘shanda u Krishtianuni ko‘rgan.

Agar Ronaldu meni kechki ovqatga taklif qilsa, men bu taklifni qabul qilishga tayyorman», – dedi Paula.