Ўтган ҳафтада Германиянинг Штутгарт шаҳрида спорт гимнастикаси бўйича жаҳон чемпионати баҳслари ўтказилгани ҳақида хабар бергандик. Жаҳон чемпионатида Ўзбекистон терма жамоаси муваффақиятли иштирок этди ва бирйўла икки атлетимиз келгуси йил Япониянинг Токио шаҳри мезбонлик қиладиган XXXII ёзги Олимпия ўйинлари йўлланмасини қўлга киритишди.
Гарчи вакилларимиз дунё биринчилигида совриндорлар қаторидан жой олишолмаган бўлса-да, олимпиада ўйинларига лицензия берувчи ўринлардан жой ола билишди.
Бугун эрта тонгда ҳамюртларимиз Ўзбекистонга қайтиб келдилар ва уларни Ислом Каримов номидаги Тошкент Халқаро аэропортида Жисмоний тарбия ва спорт вазирлиги ва Ўзбекистон гимнастика федерацияси ҳамда оммавий ахборот воситалари ҳодимлари томонидан кутиб олинди.
“Гарчи мусобақада ғолиб бўла олмаган бўлсамда, ўз натижамдан ҳурсанд бўлдим. Чунки мен Олимпия ўйинлари йўлланмасини қўлга киритдим. Менинг асосий мақсадим Токиода бўлиб ўтадиган Олимпияда ўйинларида ғолиб бўлиш” – дейди Оксана Чусовитина.
Шу тариқа ўз номини тарих зарварақларига битган Оксана фаолиятида саккизинчи бор Олимпия ўйинлари йўлланмасини қўлга киритмоқда.
Бу эса ўзбек ва жаҳон спорти тарихи учун улкан муваффақият демакдир. Регламентга кўра, ҳамюртларимиз келаси йил Токио Олимпиадасида ўзлари истаган йўналишда иштирок этишлари мумкин.
Ўзбекистон Миллий олимпия қўмитаси Оксана Чусовитина ва Расулжон Абдураҳимовни қўлга киритилган Олимпиада йўлланмалари билан чин дилдан муборакбод этиб қолади. Шу тариқа Токио Олимпиадасига лицензия олган спортчиларимиз сони 10 нафарга етди.
Жисмоний тарбия ва спорт вазирлиги
Матбуот хизмати
