«Барселона» клуби «ПСЖ» ҳужумчиси Неймарни сотиб олиш ғоясидан воз кечиши мумкин. Бу ҳақда Mundo Deportivo хабар тарқатди.

Манбага кўра, "кўк-анорранглилар" раҳбариятига Ансуман Фатининг ўйини маъқул келмоқда. 16 ёшли футболчи чап қанотда ўзини яхши намойиш эта олди. Агар Неймар «Барса»га ўтадиган бўлса, Фати жамоанинг асосий таркибида ўйнаш имкониятидан маҳрум бўлади. Ансу ҳали ёш бўлишига қарамай, мураббийлар штаби ва раҳбарият унинг ўсишини ва доимий ўйин амалиётига эга бўлишини истамоқда.

Бундан ташқари, Неймарнинг кўп жароҳат олаётган «Барселона»ни ўйлантирмоқда. У жароҳат туфайли мавсумнинг бошланғич қисмини ўтказиб юборди. Шундан сўнг бразилиялик футболчи "ПСЖ" сафида 4та учрашувда 5та гол уриб, ёрқин ўйин намойиш қилди. Бироқ Неймар Бразилия терма жамоаси сафида жароҳат олиб, яна бир ойга сафдан чиқди.

Ниҳоят, 2021 йилда клубнинг директорлари кенгашига сайловлар бўлиб ўтади. Ҳозирги раҳбарият сайловдан бир йил олдин Неймарнинг трансферини амалга оширишни истамаяпти.

Ҳозирги кунда каталонияликлар учун асосий вазифа — Луис Суареснинг ўрнини босиши мумкин бўлган марказий ҳужумчи топиш. Бунинг учун клуб катта маблағдан воз кечишга тайёр.