Ўзбекистон терма жамоаси ярим ҳимоячиси Достон Ҳамдамов Сингапурга қарши кечган баҳсдан (3:1) сўнг ўйин ҳақида фикрлари билан ўртоқлашди.

– Аввалам бор ғалаба билан табриклайман. Бугунги ўйиндан ҳам мухлислар йирик ҳисобдаги ғалаба кутишганди. Учрашувни яхши бошладик, аммо гол уриб олганимиздан сўнг футболчилар бўш ҳаракат қилишди. Бу ҳақида нима дея оласиз?

– Раҳмат! Ўйин яхши ўтди деб ўйлайман. Сингапур ҳам яхши қаршилик кўрсатди. Уларда ҳам кўплаб имкониятлар бўлди. Бизни бўш томонимиздан унумли фойдаланишди ва биринчи бўлим якунида ҳисобни тенглаштиришди. Муҳими ўтказиб юборилган голдан сўнг тушкунликка тушиб қолмадик ва ҳаракат қилиб якунда ғалаба қозондик.

– Бугунги ўйинда сиз кўплаб вазиятларда марказий ҳужумда ҳам кўриндиз. Бу Абрамов томонидан ўйлаб топилган чалғитиш усулими?

– Ҳа, тўғри кўпроқ марказда ҳам ҳаракат қилдим. Ўйин олдидан Абрамов менга шундай кўрсатма берган эди. Ҳар бир мураббийнинг ўз тактик қарашлари бор шунинг учун бугун марказда ҳам ҳарақат қилдим. Мен мураббий қўйган ҳарқандай нуқтада ўйнашга тайёрман.

– Фаластин кеча Саудиядан ҳам очко тортиб олишга эришди. Нима деб ўйлайсиз Фаластин термаси чиндан ҳам кучликми, ёки биз уларга тасодифан ютқаздикми?

– Ҳар бир жамоага жиддий қараш керак. 1-турда Фаластиндан учралган мағлубиятни тасодифий деб айта оламан. Бу мағлубият тасодиф эканлигини исботлаш учун Фаластинни ўзимизда мағлуб этишимиз керак.

Жалолиддин Қобилжонов ёзиб олди.