Италиянинг «Наполи» клуби президенти Аурелио Де Лаурентис жамоанинг сўнгги ўйинлардаги натижаларидан ранжиди.

“Наполи” сўнгги учта учрашувда ғалаба қозона олмади. Шу сабабли, клуб президенти Де Лаурентис футболчиларни ҳафтанинг охирига қадар клуб базасидан чиқмаслигини талаб қилиб, уларни қамаб қўйди. Унинг айтишича, бу футболчиларга жазо эмас, шунчаки футболчилар бир бирларини яхшироқ билишлари учун имконият экан.

«Наполи» бош мураббийи Карло Анчелотти эса президентнинг бу ишидан норози бўлди.

— Сиз рози бўлишингиз ҳам, рози бўлмаслигингиз ҳам мумкин.Агар мендан бу борасида қандай фикрда эканлигимни билмоқчи бўлсангиз, у ҳолда айтаман: бу қарорга мен рози эмасман. Бироқ, мураббий мураббийлигича қолиш керак. Бу клуб раҳбарияти қабул қиладиган қарор. Менга президент қўнғироқ қилди ва омад тилади. Клуб президенти қабул қилган қарор ўзгармади. У ҳам жамоанинг натижаларига биз каби жон куйдиради, — деди Анчелотти.

Ушбу ҳафтада «Наполи» ЕЧЛ доирасида «Зальцбург» клубига қарши ўйнайди. Шунингдек, «Женоа» клубига қарши А Серия доирасида баҳс олиб боради.