ЖЧ-2022 саралаш доирасидаги Ўзбекистон — Саудия Арабистони ўйини биринчи бўлими тугади.

Ўйин борасида ҳозирча эътироз йўқ, тўғри камчиликлар бор, ахир ҳеч нарса камчиликсиз бўлмайди.

Хато: иккинчи қаватга таяниб ўйнаш иш бермаяпти. Афтидан, рақиб мураббийи Элдор Шомуродовнинг бош билан ўйнашдаги маҳоратини билиб, уни ҳавода «блоклаш»ни топширган. Шу боисдан араблар ҳимоясида бўйи узун футболчилар ўйнашяпти ва бутун тайм давомида ҳаводан узатилган тўплар самара бермаяпти. Демак, иккинчи бўлимда ана шу жиҳатни инобатга олиш керак.

Пенальти: Рустам Ашурматов билан боғлиқ вазиятда пенальти бор эди, шак-шубҳасиз. Ашурматовнинг ҳаракати менга Рамоснинг Салоҳга нисбатан ҳаракатини эслатиб юборди, у рақибнинг қўлини қисиб олди ва йиқилгунга қадар қўйиб юбормади. Бу вазиятда энг тўғри йўл — рақибни ўтказиб юбориш эди.

Иккинчи вазият, Элдор Шомуродов йиқитилган вазиятда контакт бор эди. Аммо аксарият ҳолларда, Европада бундай ҳолатларда кўпинча пенальти берилмайди. Ҳакам ҳам ушбу ҳолатда пенальти белгилаш учун етарли асос йўқ деб ҳисоблади.

Ҳозирча ёмон эмас. Саудия Арабистони жуда тезкор ўйнаяпти. Шу боис ҳимояда тезкорроқ футболчиларга таянган маъқул. Одил Аҳмедов бир-икки вазиятда рақибни ўтказиб юборди, Ашурматов эса терма жамоага ҳали тўлиқ мослашмаганга ўхшаяпти. Умид қиламизки, иккинчи бўлимда Абрамов керакли чораларни кўради.