JCH-2022 saralash doirasidagi O‘zbekiston — Saudiya Arabistoni o‘yini birinchi bo‘limi tugadi.
O‘yin borasida hozircha e’tiroz yo‘q, to‘g‘ri kamchiliklar bor, axir hech narsa kamchiliksiz bo‘lmaydi.
Xato: ikkinchi qavatga tayanib o‘ynash ish bermayapti. Aftidan, raqib murabbiyi Eldor Shomurodovning bosh bilan o‘ynashdagi mahoratini bilib, uni havoda «bloklash»ni topshirgan. Shu boisdan arablar himoyasida bo‘yi uzun futbolchilar o‘ynashyapti va butun taym davomida havodan uzatilgan to‘plar samara bermayapti. Demak, ikkinchi bo‘limda ana shu jihatni inobatga olish kerak.
Penalti: Rustam Ashurmatov bilan bog‘liq vaziyatda penalti bor edi, shak-shubhasiz. Ashurmatovning harakati menga Ramosning Salohga nisbatan harakatini eslatib yubordi, u raqibning qo‘lini qisib oldi va yiqilgunga qadar qo‘yib yubormadi. Bu vaziyatda eng to‘g‘ri yo‘l — raqibni o‘tkazib yuborish edi.
Ikkinchi vaziyat, Eldor Shomurodov yiqitilgan vaziyatda kontakt bor edi. Ammo aksariyat hollarda, Yevropada bunday holatlarda ko‘pincha penalti berilmaydi. Hakam ham ushbu holatda penalti belgilash uchun yetarli asos yo‘q deb hisobladi.
Hozircha yomon emas. Saudiya Arabistoni juda tezkor o‘ynayapti. Shu bois himoyada tezkorroq futbolchilarga tayangan ma’qul. Odil Ahmedov bir-ikki vaziyatda raqibni o‘tkazib yubordi, Ashurmatov esa terma jamoaga hali to‘liq moslashmaganga o‘xshayapti. Umid qilamizki, ikkinchi bo‘limda Abramov kerakli choralarni ko‘radi.
