Италиянинг "Интер" клуби бош мураббийи Антонио Конте ЕЧЛ доирасида "Барселона" клубига қарши бўлиб ўтадиган учрашув ҳақидаги фикрлари билан ўртоқлашди.

"Гуруҳнинг сўнгги учрашувида кейинги босқичга чиқиш учун кураш олиб бораётганимиздан фахрланамиз. Сўнгги пайтларда жамоа кўп ўйин ўтказди, ўйлайманки, сезиларли ўсишга эришдик. Биринчи учрашувда “Барселона”га қарши яхши ўйин намойиш этгандик, ўша баҳсда “Барса” маълум муддат устунликка эришган ҳолда ғалаба қозонган эди.

Жароҳатлар сабаб таркибимизда йўқотишлар бор, шу боис, биринчи учрашувимиздаги таркибимизга қараганда бугун ўзгартириш киритишга мажбурмиз. Рақибнинг кучли футболчиларига қарши якка курашларда имкониятни бой бермаслигимиз учун ва рақиб ҳужумлари кескинлигини камайтириш учун жамоани тайёрладим.“Барселона”нинг комбинацион ўйинларига осонликча таслим бўлади деб ўйлаш бемаънилик. Аммо, биз дадил ўйнашимиз, ҳимояда ишончли ўйниш намойиш этишимиз ва рақиб яратадиган муаммоларга тайёр туришимиз керак", - деди Конте УЕФА расмий сайтига.