Ҳозирда ижара асосида «Эвертон» шарафини ҳимоя қилаётган «Манчестер Сити» вингери Жек Грилиш навбатдаги можаро марказида қолди. The Sun нашрининг хабар беришича, футболчи Манчестердаги барлардан бирида дўстлари билан дам олаётган вақтида ухлаб қолган.
Гувоҳларнинг сўзларига кўра, дўстлари уни уйғотишга ҳаракат қилишган, бироқ Грилиш ичилган спиртли ичимликлар миқдори туфайли ўзини назорат қила олмаган. Таъкидлаш жоизки, 30 ёшли футболчи айни пайтда оёғидаги жарроҳлик амалиётидан сўнг тикланиш жараёнини ўтамоқда. Экспертларнинг фикрича, ушбу ҳолат ва жароҳат туфайли Грилиш нафақат мавсумнинг қолган қисмини, балки 2026 йилги жаҳон чемпионатида Англия терма жамоаси сафида иштирок этиш имкониятини ҳам бой беради.
Шу йилнинг март ойида футболчи ижтимоий тармоқларда «янада кучлироқ бўлиб қайтиш устида ишлаётгани» ҳақида хабар қолдирган эди. Ўшанда у гипсдан воз кечиб, махсус ҳимоя ботинкаси ва скутер ёрдамида ҳаракатланаётганини намойиш қилганди.
Бироқ тикланиш жараёнига қарамай, Грилиш тез-тез кўнгилочар тадбирларда кўриниш бермоқда. Жумладан, у яқинда Римда «Эвертон» дарвозабони Жордан Пикфорднинг рафиқаси туғилган кунини нишонлаш маросимида иштирок этган.
