А серияда икки марта қаторасига 5:0 ҳисобидаги ғалабани қўлга киритган жамоа “Аталанта” бўлишини ким тасаввур қилганди? Тағин бу икки ажойиб ғалабанинг биринчиси ўтган йилнинг охирида “Милан”га қарши баҳсда, иккинчиси янги йилда миланликларга ўхшаш ўтмиши билан фахраланадиган “Парма” устидан...
“Аталанта”нинг айни пайтдаги ҳужуми даҳшатли кўринишда – 48та гол. Чемпионатда энг яхшиси. Иккинчи ўринда бораётган “Лацио” саккиз голга ортда.
Бу тарихий натижадан юқориси фақатгина 1958/59 йилги мавсумда “Фиорентина”да бўлган. Флоренцияликлар ўшанда “Милан”дан кейинги иккинчи ўринни қўлга киритишган.
Матбуот бергамоликларнинг гўзал ўйинидан сармаст. Gazzetta dello Sport журналисти Паоло Кондо: “Скудетто” сўзи бергамоликларнинг олий мақсади эмас, юқорироққа...” деб таърифлаган.
Жанпьеро Гасперинигина бу гапларга эътибор бермай, ўзини ушлаб турибди: “Биз чемпионлик учун курашмаяпмиз. Мақсадимиз екрокубокларда қатнашиш...”
Эътибор беринг, шунда ҳам Чемпионлар Лигаси деган сўз ишлатилмаяпти, еврокубоклар!
Кечаги матбуот анжуманида ҳам камтарлик: “Интер” билан ўйинимиз бизнинг даражамизни очиб беради: Италиянинг кучли жамоаларига қанчалик яқинмиз...”
Келинг, таркибдаги ўйинчиларни, Конте ва Гасперинининг тактик қарашларини ўйиннинг ўзига қолдирайлик. Юқоридаги анонснинг ўзи учрашув савиясини кўрсатиб беришга етарли.
00:45да FUTBOL TV каналидан узоқлашмайсиз деган умиддаман!
Хайрулла ҲАМИДОВ.
