Бундан аввалроқ грандларнинг энг йирик ғалабалари ва мағлубиятлари ҳақидаги маълумотлар билан ўртоқлашиб ўтдик. Энди футбол тарихидаги энг йирик ҳисобдаги дурангларни ҳам бир эслаб ўтсак.

“Вест Бромвич” 5:5 “Манчестер Юнайтед”

2012/13-йилги мавсумда бўлиб ўтган учрашув иккита сабабга кўра, АПЛ тарихида ўчмас из қолдирди. Биринчи сабаб сифатида таблодаги супер жанговар ҳисоб бўлса, иккинчи сабаб ўша куни Сер Алекс “қизил иблислар”ни сўнгги бор майдонга бошлаб тушган эди. Энг қизиғи шундаки, учрашувнинг 30 дақиқасида “Манчестер Юнайтед” 3 та тўп фарқи билан олдинда борар, ғалаба деярли чўнтакда эди. Иккинчи бўлимнинг илк 10 дақиқасида ҳисобдаги фарқни минимал кўринишга олиб келган “Вест Бромвич” яна 2 та гол ўтказиб юборгач, “қизил иблислар”нинг ғалабасига ҳеч кимда шубҳа қолмади, фақат Лукакудан ташқари! Сўнгги 10 дақиқа давомида белгиялик ҳужумчи иккита гол киритган бўлса, Юсуф Мулумбу ҳам ўз ҳисобига гол ёзиб қўйишни уддалади. Буюк Фергуссоннинг хайралашув учрашуви ғалаба билан якунланмади, бироқ АПЛнинг олтин коллексиясидан жой олди.

“Шалке” 6:6 “Бавария”

1983/83-йилги мавсум “Бундеслига” тарихидаги энг сермаҳсуларидан бири бўлган десак, адашмаган бўламиз. Ўша йили жамоалар ҳар бир учрашувда 3,6 тадан гол киритишни уддалашгани сўзимизга исбот бўла олади. Кубок ўйинлари ҳам бундан мустасно эмас. Ўша йили Германия кубогининг ярим финалида  “Шалке” ва “Бавария” жамоалари тўқнаш келишади. Ўйиннинг асосий дақиқаси 5:5 натижаси билан якунлангач, жамоалар қўшимча таймларда ҳам биттадан гол киритишни уддалашди. Якуний ҳисоб 6:6! Аҳамиятлиси шундаки, ўша учрашувда киритилган голларнинг 4 тасини “Бавария”нинг ҳозирги президенти Кар Ҳайц Руминиге ўз ҳисобига ёзиб қўяди. 2001-йилда немис нашрлари ортда қолган асрнинг энг чиройли ўйинлари ўнлигини тузиб чиқишади. Энг қизиғи шундаки, биз бугун хотирларган учрашув кучли бешликка ҳам кира олмайди.

“Лион” 5:5 “Марсел”

2009/10 йилги мавсумда “Лига 1” мусобақаси тарихидаги энг томошабоп ўйинлардан бири бўлиб ўтган. Дарҳақиқат, ўша учрашувда мухлислар 10 та турли ҳил услубда киритилган голларга гувоҳ бўлибгина қолмай, ўзига ҳос кичик камбекдан ҳам лаззат олишган эди. Франциядаги икки Олимпик қарама-қаршилигида Пянич, Гову, Брандао, Лисандро Лопез, Бастос сингари футболчилар катта саҳнага чиқишгач, учрашувга Тулаланнинг автоголли мантиқий нуқтани қўяди. Қувонарлиси шундаки, иккита жамоа ҳам футбол ҳакам ҳуштагига қадар давом этишини барчага яна бир бор эслатиб қўйишади.

“Ливерпул” 5:5 “Арсенал”

Ортда қолган йилнинг энг томошабоп футболи сифатида ёдимизда қолган ўйинни эсламасликка ҳаққимиз йўқ. Кубок учрашуви сифатида катта эътибор берилмаган ўйин чинакам спектаклга айланиб кетгани ёдингиздан кўтарилмагани аниқ. Жамоалар ўйинга шу қадар берилиб кетишдики, 62-дақиқага келиб таблода 4:4 ҳисоби ёниб турар эди. Ўша оқшом мухлислар бир-биридан чиройли 10 та голни кўришга муваффақ бўлишди. Ҳакам томонидан қўшиб берилган дақиқалрда Ориги “Ливерпул”ни мағлубиятдан қутқариб қолгач, Клопп шогирдлари пеналтилар сериясидагина рақибни таслим қилишади.

“Атлетико” 6:6 “Атлетик”

“Ла Лига” тарихидаги энг йирик дуранг 1949/50- йилги мавумда қайд этилган. Испаниянинг икки тарихий жамоалари тўқнашувида мезбонлар иккинчи бўлим бошида 4та тўп фарқи билан олдинда кетаётганига қарамай, учрашув сўнгига қадар “Атлетико” футболчилари мувозанатни тиклашни муваффақ бўлишади. Шу кунга қадар Испания чемпионатида бундай йирик натижа қайд этилганни йўқ.