«Спортинг» ярим ҳимоячиси Бруну Фернандеш «Манчестер Юнайтед» билан расман шартнома имзолади. Манкунианликлар 25 ёшли футболчи билан беш ярим йиллик шартномани расмийлаштиришди. Шартномага кўра, томонлар келишувни яна бир йилга узайтиришлари мумкин.

Аввалроқ Фернандешнинг йиллик маоши 6 миллион еврога тенг бўлиши ҳақида хабар тарқатилган эди. Шунингдек, «Юнайтед» Бруну учун 55 миллион евро ҳамда яна 25 миллион евро миқдорида турли бонуслар шаклида тўлаб бериши мумкин.

"Биз Брунуни бир неча ойдан бери кузатиб келаётган эдик. Унинг маҳорати барчада илиқ таассурот қолдирди. Муҳими, у ажойиб характерга эга бўлган ажойиб инсон. Иккинчи даврада ўйинимизнинг кучайишида ёрдам беради, деб ўйлайман. Қишки таътилда Бруну жамоа ўйинига мослашиши ва жамоадошлари билан танишиши учун фойдали бўлади", - деди "Манчестер Юнайтед" бош мураббийи Уле-Гуннар Сульшер клуби расмий сайтига берган интервьюсида.