«Ювентус» клуби собиқ президенти Жованни Коболли Жильи коронавирус пандемияси пайтида Италияни тарк этган футболчиларни танқид остига олди.

«Ҳозир танқид қилиш осон, аммо четдан қараган киши сифатида бу футболчилар нима учун Италияни тарк этганини тушунмаяпман. Умид қиламан, улар тезда Туринга қайтишади. Машғулотни қайта бошлаш улар учун қийин бўлади. Чунки, улар яна 14 кунлик карантин муддатини ўташлари керак.

Роналду Португалияга кетганида «Ювентус»да вазият қийинлашган эди. У онасини кўришга кетаётганини айтган эди, энди эса улкан бассейн олдида тобланаётганини намойиш қилмоқда.

Роналдуга имтиёз тақдим этилган эди. Кейин Игуаин ўз онасининг олдига йўл олди. Яна кимлардир у ёққа, бу ёққа кетди. Вазият оғирлашди. Уларнинг барчаси «Ювентус» ихтиёрида қолиши керак эди. Худди «Интер» ўйинчилари каби.

Мен клубда тартиб-интизомни сақлаб турган Жанни Аньелли, Умберто Аньелли ва Бонипертини соғинаман. Улар сочлари ўсиб кетган футболчиларни сочни қисқартиришга мажбур қилишар эди», – деди Коболли Жильи.