6 апрель. Бугун тарихий ўйинларга тўхталиб ўтаётган эканмиз, хотирамизга мурожаат қиламизки, қайси баҳс 6 апрелни безаб беради?

Ҳа, шубҳасиз, 2003/04 йилги мавсум, Чемпионлар Лигаси ўйини. Чорак финал жавоб ўйини. "Монако" "Реал"ни қабул қилган оқшом эсингиздами? Аср охири ва янги аср бошларида ҳар икки йил чемпион бўлишга одатланган "Реал" чемпион бўладиган йилида ўйнаётганди. Бунинг устига, рақиб — "Монако". Даража зўр эмас. Янада ишончлироқ ҳолат – биринчи ўйинни уйида ўтказган ва 4:2 ҳисобида якунлаганди. Кўринишидан зўр ҳисоб, икки тўп фарқи билан ўзидан кучсиз рақиб уйига йўл олиш. Аммо Эльгера, Зидан ва Фигунинг дублига биринчи бўлим охирида Скилачи, ўйин тугаши арафасида Фернандо Мориентеснинг йўллаган жавоб голлари иккинчи ўйинда муҳим бўлиб чиқди.

"Реал"дан ижарага ўтган ҳужумчи олтинчи апрель оқшомининг яна бош қаҳрамонига айланди. "Луи II" стадионига тўпланганлар "Монако"нинг ярим финалга чиқишига ишонқирамай кузатишган ўйинни. Чунки 36-дақиқада Рауль ҳисобни очганида, монегаскларнинг иши янада қийинлашиб кетди. Дидье Дешам шогирдлари ўз дарвозалари даҳлсизлигини таъминлаган ҳолда учта гол уришлари зарур бўлиб қолганди.

Танаффусга чиқиш арафасида Людовик Жюли гол йўллаб, кийим алмаштириш хонасига клубдошларини недир умид билан йўл олишларини таъминлади. Иккинчи бўлимда жамоалар ҳолати алмашиб қолгандек эди. Мориентес 48-дақиқада тез гол уриб, "Реал"ни карахт аҳволга тушириб қўйди. Жюлининг 66-дақиқада дубль муаллифи бўлиши эса "буюк қатл"ни осонлашди. Гол ўша ҳафта, ўша ой ва ўша йил голлар ўнлигидан жой олган. Голнинг бу қадар чиройли йўлланиши ўша кунги ўйинга мантиқий якун эди – 3:1. Меҳмонда урилган гол эвазига "Монако" ярим финалда! Сенсация, азизлар!

... Ўзи 2004 йили сенсациялар мавсуми бўлган. Грециянинг Европа чемпиони бўлгани ва чемпионлар лигасида ҳам ярим финалга кутилмаган клубларнинг йўл олгани ёдингизда бордир? Олтинчи апрель Лондон дербисидаги сенсацион натижа билан ҳам эсда қолганки, буни ҳозир эсламасдан ўтсак инсофдан бўлмас. Ҳали жамоага Моуриньо келмаган, Абрамович молиявий инқилобларини амалга оширмаган аср аввалида "Челси" клуби Арсен Венгер бошчилигидаги "Арсенал"га рақобатчи эмасди. Даража бошқа-бошқа эди. Дейлик, ўша мавсумнинг "Реал" "Монако"си, "Депортиво" "Милан"и ўртасидаги фарқ мавжуд эди. Қизиқ томони, "Монако" "Реал"ни енгаётган пайти, "Хайбери"да "Челси" "Арсенал" устидан ғолиб бўларди.

"Стэмфорд Бриж"да 1:1 ўйнаган клубнинг меҳмондан ғалаба билан қайтиши ишониб бўлмас натижа эди. Ўша ишониб бўлмас натижа қайд этилган.

Қизиғи, бу кеча ҳам мағлуб клуб ҳисобни очган, мухлисларини анча хотиржамликка чақирганди. Рейес гол муаллифи бўлган. Аммо танаффусдан сўнг Клаудио Раньери йигитлари буткул бошқа даража намойиш этишган. Лэмпард ўртасидаги мувозанатни тиклаган, Уэйн Бриж учрашув тугаши арафасида ғалаба тўпини киритганди.

Айнан шу ўйиндан сўнг Челсининг олтин даври бошланган, десак муболаға бўлмайди. Тўғри, клуб кейинги босқичда "Монако"дан енгилган, бироқ Моуриньонинг ташрифи билан бошқа ўлчовлар бўйича ўйнаши аниқ бўлиб улгурганди.

Хайрулла Ҳамидов.