«Манчестер Юнайтед»нинг собиқ футболчиси Рио Фердинанд Криштану Роналдуга қарши кечган ўйин ҳақида гапирди.
2003 йилда «МЮ» "Спортинг" билан ўртоқлик ўйини ўтказган, ўшанда Роналду португаль клуби сафида эди. Шу ўйиндан кейин Манчестер клуби Криштиануни 12,24 млн фунтга сотиб олган.
«Бу бизга Роналду ким эканлигини кўрсатган ажойиб тарих. «МЮ» ўшанда Роналдиньони сотиб ололмаган, тушкун ҳолда эди. Биз «Спортинг»га қарши биринчи бўлимни ўтказдик. Танаффусда кийим алмаштириш хонасида Роналдуга қарши ўйнаган Жон О`Шининг аҳволи ёмонлашиб қолди. Унга ҳаво етишмас, кўп югурганидан ҳансираб қолганди, ҳатто бизга жавоб ҳам қайтара олмади.
Ўйиндан кейин автобус ярим соатга кечикди. Жамоа сабабини тушунмади, ўшанда клуб раҳбарияти Роналдунинг трансферини ҳал қилаётганини билмасдик. Биз ўшандаёқ унинг энг яхшилардан бири эканлигини тушунгандик.
Роналду мен кўрган футболчилар ичида атрофида керакли мутахассисларни жамлаган биринчи футболчи эди. Мен унинг рўпарасида яшардим, меҳмонга бориб турардим. Бир марта ундан "Бу одамлар уйингда нима қиляпти?" деб сўрадим. Шунда у: «Бу физиотерапевт, бу массажчи, бу диетолог», деди. У ўзи учун катта сармоя ажратган, чунки кўп нарсани биларди", деди Фердинанд.
