Беларусь чемпионатининг дастлабки 5та тур ўйинлари якунланди. Tribuna.com сайти ушбу мавсумда ўзини кўрсатаётган 10 футболчи ҳақида маълумот тайёрлади. Улар орасида «Энергетик-БГУ» ҳужумчиси Жасур Яхшибоев ҳам бор. Сайтнинг ўзбекистонлик футболчи ҳақидаги хулосаси билан таништириб ўтамиз.

Жасур Яхшибоев, «Энергетик-БГУ»
Статистика: 5 ўйин, 3 гол, 1 узатма

22 ёшли ўзбекистонлик футболчи илк турда БАТЭ дарвозасига 2та гол уриб, Беларусь футболига дадиллик билан кириб келди. Кейинги турда Даниил Мирошниковга голли узатма берган бўлса, «Минск»га қарши 3-баҳсда яна битта голга муаллифлик қилди. Яхшибоев ҳақида нафақат бизда, балки унинг Ватанида ҳам гапира бошлашди. Ўзбекистон футбол федерацияси вице-президенти Равшан Эрматов ундан катта келажак кутмоқда. Футболчининг ўзи эса мавсум тўпурари бўлишни истамоқда. Жасур «Пахтакор»га қайтишни истамаяпти. Польшанинг «Ракув» клуби унга қизиқиш билдирди. Яхшибоев кейинги 2та ўйинда гол урмади, «Энергетик-БГУ» эса ҳар икки баҳсда ютқазди.

Яхшибоев "талабалар"нинг қарши ҳужумга асосланган ўйин услубига идеал даражада мослашиб кетди. Деярли барча голлар у орқали урилмоқда. Ҳужумчи ажойиб дриблигга эга ва у бу хусусияти орқали ҳужумга кескинлик бағишламоқда. InStat маълумотларига кўра, ўзбекистонлик легионер деярли ҳар бир ўйинда ўртача 11 марта рақибларни алдашга уриниб, уларнинг 8тасини муваффақиятли амалга оширмоқда. Беларусда ҳеч бир футболчи бунчалик кўп финт ишлатмайди. БАТЭ ва «Минск»га қарши баҳсларда унинг уринишларининг 90 фоизи муваффақиятли бўлди.

Шунингдек, Жасур тўпни жуда яхши қабул қилади. Илк уринишдаёқ ўзига тезлик олиш ёки дриблинг ишлатиш учун қулай имкониятни юзага келтиради.

Ҳозирча «Энергетик»даги яна бир ўзбек футболчиси Шаҳбоз Умаров ҳақида бундай фикр билдириш қийин. Тўпни қабул қилиш жараёнида у нигоҳини тўпга қаратгани учун кўпинча уни йўқотиб қўймоқда. "Студентлар" мураббийлар штабининг айтишича, Умаров Яхшибоевдан кучлироқ экан, лекин мавсумолди йиғини пайтида у касал бўлиб қолгани учун ҳозирча ўзининг бор имкониятини кўрсата олмаяпти.