UZREPORT TV канали UFC 249 мусобақаси трансляция ҳуқуқини харид қилганидан хабардор бўлдингиз. Қўшимча қилмасам бўлмайди. Чунки бу менга ҳам бевосита алоқадор янгилик.

Биласиз, анча йиллардан бери ўз ижтимоий тармоқларимда имкон қадар UFC оламига томошабинларни яқинлаштиришга харакат қилиб келаман. Лекин, бу ҳаммаси шахсий ташаббус эди. Дунёда рейтинги тобора ошиб бораётган бу промоушннинг биздаги аудиторияси ўсиши барибир телевизион расмий трансляция билан боғлиқ эканлигини тушунардим.

UZREPORT TV каналидаги фаолиятим давомида бир неча бор раҳбариятга бу юришни амалга ошириш борасида таклифлар билдирганман. Канал раҳбари мухлисларга қизиқ бўлган ҳар қандай таклифни кўриб чиқиб, ўз имкониятларини ишга солиб келган. UFC бўйича ташаббус ҳам эътибордан четда қолмади. Бу учун миннатдорман. Узоқ йиллик уринишлардан сўнг мана ҳозир насиб қилган экан, биз Ўзбекистонда расман биринчи бор UFC жанглар кечасининг лицензион трансляциясини амалга оширамиз. УзРепортТВ спорт трансляциялари ривожи йўлида яна бир катта қадам ташлади. Албатта ҳамкорлар ёрдамида.

Худо хоҳласа бирга томоша қиламиз! 10 май якшанба тонг саҳарлаб соат 5:00 да жанглар трансляцияси бошланади. Тахминан 4 соат давом этади. Агар Дэна Уайт тузган карддан жанглар тушиб қолмаса, 10дан ортиқ супер тўқнашувлар гувоҳи бўласиз.

Эфирда кўришгунча!

Даврон Файзиев.