УЕФА Чемпионлар лигаси 2019/2020 йилги мавсуми март ойида пандемия сабабли тўхтатилганди. Энди мусобақа «тўртлар финали» форматида охирига етказиб қўйилиши мумкин, дея хабар бермоқда "Goal Italia" нашри.

Сўнгги ҳафтада ҳал қилувчи ўйинларни Европанинг топ-5 чемпионатлари орасида биринчи бўлиб қайта тикланган Германияда бўлиши муҳокама қилинди.

Аслида жорий мавсум финал учрашуви Туркиянинг Истанбул шаҳрида ўтказилиши керак эди. Аммо, Туркия инсонлар саломатлигига кафолат бера олмаслиги мумкин.

УЕФА Чемпионлар лигасини 31 август куни якунлашни режалаштирмоқда. 1/8 финал босқичи доирасидаги қолган ўйинлар 7-8 август, чорак финал учрашувлари 13-14 август кунлари бир ўйин формати орқали нейтрал майдонда ўтиши лозим.

Маълум бўлишича, кўплаб клублар ҳаттоки чорак финал ўйинларини ҳам Германияда ўтишини афзал кўришган.

«Тўртлар финали» формати бошқа спорт турларида, масалан, баскетбол ва қўл тўпида ҳам қўлланилмоқда.

Бунинг моҳияти шундаки, тўрт жамоа ўртасидаги ҳал қилувчи ўйинлар, бир неча кун ичида олимпия тизими бўйича олдиндан белгиланган шаҳарда, бир ўйинли форматда ўтказилади.