Хабарингиз бор, 13 июнь куни салкам уч ойлик танаффусдан кейин Суперлига ўйинлари давом эттирилади. Учрашувларни ёритиш истагида бўлган ОАВ ходимларига беллашувни стадиондан туриб фаолият олиб боришларига рухсат берилди. Фақатгина Республика махсус комиссияси талабларига кўра, журналист ва фотомухбирлар сони чекланади.
Маълумки, «Бунёдкор» Суперлиганинг 4-тур доирасида 13 июнь куни «Қўқон-1912» жамоасини қабул қилади. Ушбу учрашувни бевосита стадиондан ёритиб боришни истаган ОАВ вакиллари bunyodkor_club@mail.ru электрон почтаси ёки @bunyodkorfc телеграм манзилига хабар қилишларини сўралади. Журналистларни рўйхатга олиш 13 июнь куни соат 12:00га қадар давом этади.
«Бунёдкор» – «Қўқон-1912» учрашувига фақатгина «Бунёдкор» матбуот хизматига хабар юборган ва ЎзПФЛ аккредитациясига эга бўлган ОАВ вакиллари рўйхат асосида киритилади.
ОАВ ходимларидан ўйин бошланишидан 30 дақиқа олдин стадионга келиши ва санитария қоидалари, нормалари ва гигиена нормативларига мувофиқ ҳолда фаолият олиб боришлари сўралади.
Учрашув «Бунёдкор» стадионида соат 19:00 да бошланади.
