Ушбу жамоалар чемпионат доирасида ҳозирга қадар 48 бор тўқнаш келган. Уларнинг 40 тасида "шерлар" ғалаба қозонган бўлса, 4 тадан беллашувда дуранг ва жиззахликларнинг зафари кузатилган. Тўплар нисбати 123:38, пойтахтликлар фойдасига.

Жиззахдаги ўйинларнинг 18 тасида "Пахтакор" муваффақиятга эришган. Уч мартадан эса мезбонларнинг қўли баланд келган ва дуранг натижа қайд этилган. Жиззахда ўтган йили кечган баҳсда "Пахтакор" 2:1 ҳисобида муваффақиятга эришган. 2013-йил эса 0:0 ҳисоби билан тугаган учрашувда "Сўғдиёна" уйдаги охирги очкосини қўлга киритган. Сафардаги сўнгги 6 баҳсда "Пахтакор" кетма-кет ғалаба қозонган..

"Пахтакор"нинг "Сўғдиёна" устидан қозонган энг йирик ғалабаси 6:1 ни ташкил этади. Жиззахликлар эса 1992-йилги мавсум тошкентликларни 4:1 ҳисобида мағлуб этган.

Ушбу қарама-қаршилик соат 18:00 да "Спорт" телеканали орқали жонли эфирда намойиш этилади.

Эслатиб ўтамиз, мазкур учрашув юртимизда жорий қилинган карантин қоида ва меъёрлари сабаб мухлисларсиз ўтказилади.