Севилья - фламенко рақси ва коррида ўлкаси. Биз учун эса "Писхуан" стадиони ва доим Европа лигаси даражасидаги клуб шаҳри. Бугун бу ерда корридага ўхшаш томоша бўлади. Фақат бир масала очиқ, ким матадор бўладию, ким буқа?!

Тўғри, матадор ҳамма вақт ҳам буқани таслим қилмайди. Аммо, тан олиш керак, одатда айнан матадор вазиятни назорат қилади, унда қуроллар бор, у йиллар давомида шаклланган жозибали техника соҳибидир. Демак, матадор бу — "Барселона"!

"Севилья" эса қизил мулета атрофида ўзини югуриб сарсон қилаётган рақибни битта имконда тутиб янчишга тайёр бўлган буқадир. Чекиниш тугади.

Ўйин ҳақида. "Севилья" ва "Барселона" ўхшаш ҳолатда. Иккаласи ҳам асосий рақобатчиси босимидан узоқлашишга харакат қиляпти. "Севилья" "Атлетико"ни 2 очко масофада ушлаб турибти. Уларнинг мақсади 3-ўрин. "Барса" эса улардан умуман бошқа даражада, космосда "Реал Мадрид" билан жанг қиляпти. Улар ўртасида ҳам 2 очко фарқ. Қоқилган қайта тиклана олмаслиги мумкин.

Бугун тунги соат 01:00да супертўқнашувни бирга томоша қиламиз!

Даврон Файзиев.