«Интер» ҳимоячиси Милан Шкриньяр А сериянинг 3та ўйинига дисквалификация қилинди. Бу ҳақда мусобақа матбуот хизмати хабар тарқатди.

Футболчи Италия чемпионатининг 27-тури доирасида «Сассуоло»га қарши бўлиб ўтган ўйинда (3:3) иккинчи сариқ карточкани олиб майдонни тарк этганидан сўнг, бош ҳакамни ҳақорат қилди. Шу тариқа, Шкриньяр қизил карточка учун битта ўйинга, ҳакамни ҳақорат қилгани учун 2та ўйинга дисквалификация қилинди. Бундан ташқари, футболчи 10 минг евро миқдорида жаримага тортилди. Шкриньяр «Парма», «Брешия» ва «Болонья»га қарши учрашувларини ўтказиб юборади.

Бундан ташқари, «Интер» бош мураббийи Антонио Конте «Сассуоло»га қарши ўйин давомида сариқ карточка олди. Мазкур огоҳлантириш италиялик мутахассис учун бешинчиси бўлди. Шунинг учун у 28 июнь куни «Парма»га қарши бўладиган ўйинни ўтказиб юборади.

«Интер» Италия чемпионатининг ушбу мавсумида 58 очко билан 3-ўринни эгаллаб турибди.