Бу йигитлар футбол оламида жуда катта машҳурликка эришгани боис, уларни бошқа касбда тасаввур қилиб кўриш жуда мушкул. Шундай бўлсада, бугун улар берган интервьюлардан олинган парчалар орқали қайси касбларни танлашлари мумкинлиги ҳақида тахмин қилиб кўрамиз.
Неймар – Хонанда
Бразилиялик футболчининг яқин дўстларининг деярли барчаси машҳур қўшиқчилар ва мусиқачилардан ташкил топган. Қаҳрамонимиз бир неча бор улар билан биргаликда саҳнада қўшиқ куйлашга ҳам муваффақ бўлган.
“Бу саволни бир неча бор ўзимга бериб кўрганман. Ҳар сафар футболчи бўлишимга ишончим комил бўлган. Агарда, инсоният футбол спорт турини ўйлаб топмаганида, катта эҳтимол билан бирор бир гуруҳнинг солистига айланган бўлар эдим. Футбол спорт тури, бироқ мен уни санъат сифатида қабул қиламан. Шундай экан, футболчи бўлмаганимда ҳам санъат билан машғул бўлган бўлар эдим.”
Криштиану Роналду – Актёр, модел
5 бор “олтин тўп”ни ўзиники қилиб олган футболчи яқиндагина ушбу саволга жавоб берди. Унинг айтишича, у ташқи кўриниши сабабли мода оламида яхшигина машҳурликка эришиши мумкин экан. Шунингдек кино оламида ҳам ўзини синаб кўришга қарши эмас.
“Мен вақтни бекор ўтказишни ҳуш кўрмайман. Шу сабабли футболчи бўлмаганимда албатта киноактёр сифатида бир нечта филмларларда рол ижро этган бўлар эдим. Менга мелодрама жанрдаги филмлар жуда ёқади. Бундан ташқари, модел сифатида фаолият олиб боришни ҳам ҳуш кўраман. Бу менга завқ бағишлайди.”
Зидан – Ҳайдовчи, курьер
Барча замонлардаги энг яхши футболчилардан бири саналувчи Зайниддин Зидан ҳаётда жуда камтарин инсон. Унинг ушбу саволга берган жавоби сўзимизга исбот бўла олади.
“Футбол менга жуда кўп нарса берди. Бунинг учун яратган эгамдан минаддорман. Агарда футболчи бўлмаганимда, бугун Франциянинг кичик шаҳарларидан бирида оддий ҳайдовчи ёки курьейлик қилаётган бўлармидим?!
Ромелу Лукаку – таржимон
Миланнинг “Интер” жамоаси ҳужумчиси ўз интервьюларидан бирида ушбу мавзуга қисқача тўхталиб ўтган эди. Унинг айтишича, ундан жуда яхши гид ёки таржимон чиқиши мумкин экан.
“Футболсиз ҳаётимни тасаввур қилишим мушкул, бироқ агар тақдир тақозо этса, албатта туризм соҳасида фаолият олиб борган бўлар эдим. Мен 5 та тилни ўзлаштирганман. Бу туризм соҳасида катта муваффақиятга эришишим учун қўл келиши мумкин эди. Бундан ташқари, жамоатчилик ишлари билан шуғулланиш борасида ҳам нимагадир эришган бўлар эдим.”
Жерар Пике – Тадбиркор
Испаниялик футболчининг ота-онаси омадли тадбиркорлар сирасига киради. Пикелар оиласи аъзоларининг деярли барчаси шахсий бизнесга эга инсонлар. Жерар ҳам улардан мустасно эмас. Қаҳрамонимиз футболчилик фаолиятини якунламай туриб, бир нечта бизнес режаларини муваффақиятли амалга ошириб келмоқда. Унинг кўзойнак ишлаб чиқарувчи компаниянинг акциядори эканлигидан хабарингиз борми? Турли видео ўйинлар ишлаб чиқарувчи компаниянинг эгаси эканлигини биласизми? Шахсий клуби мавжудлиги ҳақида маълумотга эгамисиз? Умуман олганда, “Барселона” етакчиси аллақачон бизнес оламида ҳам ном қозонишга улгурган.
“Ҳар бир эркак оиласининг келажакда муаммосиз ҳаёт кечиришини таъминлаши лозим деб ҳисоблайман. Футбол майдонида мен доимо профессионал бўлиб қоламан. Ундан ташқарида эса, ўз даромадимни керакли йўлларга йўналтириш лозим.”
