Қозоғистоннинг «Қайсар» клуби бош мураббийи Стойчо Младенов клубда коронавирус инфекцияси тарқалганини маълум қилди. Бу ҳақда «Sports.kz» хабар бермоқда.

«Қайсар»нинг 10 нафар ўйинчиси коронавирус учун топширган тест натижалари ижобий чиқди, агар ёшлар жамоаси вакилларини ҳам ҳисобласак, касалланганларнинг умумий сони 25 кишини ташкил қилади. Мен ва мураббийлик штаби вакилларининг тест натижалари салбий. «Қайсар» ўйин ўтказишда давом этадими? Билмаймиз. Машғулотлар бекор қилинди, қарорни кутмоқдамиз», — дейди Младенов.

«Қайсар» 1 июль санасида Қозоғистон Премьер Лигасининг 3-тури доирасида «Тараз»га қарши ўйин ўтказиши керак эди.

Эслатиб ўтамиз, Россиянинг «Ростов» клубида коронавирусга чалиниш ҳолати қайд этилган ва асосий жамоанинг барча аъзоси 14 кунлик карантинга олинганди. Кейинчалик жамоа чемпионат доирасида «Сочи»га қарши кечган ўйинда ёшлар жамоасидаги футболчилардан фойдаланишга мажбур бўлди ва 1:10 ҳисобида ютқазди.