Одатда чемпионлик жанги учун UFC ТОП жангчилари 8 ҳафталик тайёргарлик лагерини ўташади. Бунда биринчи ой жуда интенсив жисмоний юкламалар ва спаринглардан иборат бўлса, оҳирги ҳафталар вазн йўқотиш ва бевосита рақибга мослашиш жараёнига бағишланади. Бир кунлик кэмпдан чекиниш ҳам формага ёки вазнга таъсир қилиши мумкин. Лекин шундай атлетлар борки, кимнингдир ўрнига, қисқа муддатли огоҳлантиришдан сўнг октагонга чиқишга рози бўладилар.

UFCнинг махсус энг ашаддий «безорилар» учун жорий этган BMF камари эгаси Хорхе Масвидаль ана шу тоифага киради. У доим тайёр. Тасаввур қилинг, Камару Усман ушбу вазннинг мутлоқ чемпиони ва Масвидальга у билан уришасанми деб 1 ҳафта қолганда айтишмоқда. Қанақа тайёргарлик бу ерда? Биринчи куни Маямидан Вегасга етиб боришга кетди. Яна бир куни тиббий тест. Кейин Вегасдан Абу Дабига узоқ парвоз бўлади. Бориб озгина дам олса керак. Шундан сўнг расмий вазн ўлчаш маросими ва бошқа жараёнлар. Машғулот қилишга умуман улгурмайди. БАА ҳавосию вақт тафовутига мослашишни айтмасаям бўлади.

Аммо энг хавфли рақибга қарши мана шу жангни қабул қилди. Шунинг учун ҳам мухлислар Масвидални ҳурмат қилишади. У ўзига ишонади ва ким биландир ҳар қандай вазиятда уришишга тайёрман дедими, бажаради. Бизни эса тарихда биринчи бор жанглар оролида ўтадиган катта шоу кутяпти. Бёрнс ўрнига Масвидаль Усманга қарши чиқиши UFC-251ни йил воқеаларидан бирига айлантирди.

Даврон Файзиев.